月娘个眠床(台語詩)
2015-06-04沐沐
拄拄洗好身軀的月娘
給眠床舖在暗空中
伊猶原嫑想欲睏
伊歡喜佇欲睏進前一个人散步
歡喜聽蟲仔佇草仔埔底彈吉他
歡喜佇樹葉仔縫內
覕相揣
歡喜
專心算著
眠床邊囡仔个哈唏
佇咧巡田水的阿公
遇著她
就坐在田岸佮伊開講
查某囡仔攑頭用手摸著伊的面
對伊唱著簡單的歌
細隻貓仔爬到牆仔頂
靜靜地對伊司奶
一粒流星拄才起床
就馬上袂睏去嘍
花蕊睏去了嘍
只有香味慢慢流出來
細條溪仔睏去嘍
只有水波望著月娘
風睏去嘍
留著一个
無人聽有的聲音
月娘
月娘也睏去嘍
睏在囡仔古錐的鼾聲裡
也睏在
你暖暖又甜甜的眠夢中
***
(華語意譯)
月亮的床
剛剛洗完澡的月亮
把床舖在暗空中
她還不想睡
她喜歡睡前一個人散步
喜歡聽蟲子在草叢彈吉他
喜歡在樹葉的縫裡
玩躲迷藏
喜歡
專心地數著
床邊孩子的哈欠
在田裡巡視的爺爺
遇見了她
就坐在田埂與她聊天
女孩抬頭用手摸著她的臉
對她唱著簡單的歌
小貓咪爬到牆頭
安靜地對她撒嬌
一顆流星才剛剛起床
就又馬上睡著了
花兒睡著了
只有芬芳慢慢流出
小溪睡著了
只有水波望著月亮
風睡著了
留下一個
沒有人聽見的聲音
月亮
月亮也睡了
睡在孩子惹人憐愛的鼾聲裡
也睡在
你暖暖又甜甜的夢中